Enfòmasyon sa a ap ede w konnen kòman pou prepare trip la anvan e pandan radyoterapi pou kansè pwostat MSK Precise ou a.
3 jou anvan similasyon w lan:
- Kòmanse pran 2 konprime (125 mg) simethicone (Gas-X®) anvan w manje maten epi aprè w fin manje nan aprèmidi. Pran yo chak jou.
- Kòmanse pran 1 konprime (5 mg) bisacodyl (Dulcolax®) lannwit. Pran l chak swa.
Yon enfimyè ap ba w yon lavman dlo sale pandan randevou similasyon w lan.
Ou ka sispann pran tablèt simethicone nan ak tablèt bisacodyl la apre similasyon w lan pandan ekip swen w lan ap planifye terapi w yo.
3 jou anvan premye radyoterapi w la
- Rekòmanse pran 2 konprime (125 mg) simethicone (Gas-X) aprè manje maten ak manje aprèmidi chak jou.
- Rekòmanse pran 1 konprime (5 mg) bisacodyl (Dulcolax) chak swa.
Kontinye pran simethicone (Gas-X) ak bisacodyl (Dulcolax) chak jou jiskaske w fin fè radyoterapi a. Si ekip k ap pran swen w lan ba w lòt enstriksyon, swiv sa yo di w yo pito.
Pandan radyoterapi ou an
- Eseye poupou nan espas 1 èdtan anvan randevou radyoterapi w yo. Pa egzanp, si randevou w la a 9è nan maten, bat pou poupou a 8è nan maten ak lè w deplase pou w ale nan randevou a. Mande ekip swen w lan sa pou w fè si w pase plizyè èdtan nan wout pou ale nan randevou.
-
Si w pa poupou nan espas 1 èdtan anvan randevou w la:
- Bay tèt ou yon lavman dlo sale anvan ou ale nan randevou w lan.
- Pa manje gwo manje apre w fin bay tèt ou lavman an. Bwè sèlman likid klè, tankou dlo, bwason pou espòtif ki san ma (tankou Gatorade), ak ji fri san ma.
Di ekip swen w lan sa si dyare kòmanse pran w. Nou kapab ede w ajiste dòz bisacodyl ou a.
Di ekip swen w lan si w suiv enstriksyon sa yo men ou toujou pa ka poupou anvan chak terapi. Nou kapab ajiste preparasyon trip ou a pou n jwenn yon bagay ki fonksyone pi byen pou ou.
Rapèl enpòtan
Pou w redui gaz ak balonnman:
- Manje dousman, moulen manje a byen, epi evite itilize chalimo oswa bwè nan boutèy ak bwat. Sa ap pèmèt ou evite vale van.
- Evite bwason gazez, tankou seltzer, kola, ak byè.
- Limite manje ak bwason ki bay gaz lè ou fin dijere yo. Pa egzanp bwokoli, chou Briksèl, chou, chouflè, chou frize, zonyon, lay, fwi sèk, lèt ak pwodwi letye si w alèji ak laktoz. Li seksyon “Gid pou rejim alimantè ki limite gonfleman nan Konsènan Radyoterapi MSK Precise™ pou Kansè Pwostat pou wè lis konplè a.
- Manje legim ki kwit yo olye de legim ki kri yo.
Pou pèmèt blad pipi w plen:
- Li enpòtan pou w rete byen idrate. Pifò moun dwe genyen yon vesi ki byen plen pou similasyon ak radyoterapi yo.
- Nou konseye w bwè apeprè 64 ons (8 tas) dlo chak jou anvan randevou w yo, sof si yon lòt pwofesyonèl swen sante di w pou limite kantite dlo ou bwè.
- Yon radyoterapet ap ba w plis enstriksyon pandan randevou similasyon w lan.
