ღვიძლის არტერიის საინფუზიო ტუმბოს შესახებ

ეს სტატია აღწერს თქვენს Intera 3000 ღვიძლის არტერიის საინფუზიო ტუმბოს (ძველად ერქვა Codman-ის ტუმბო). მასში ახსნილია, თუ როგორ მუშაობს, როგორ უნდა განთავსდეს, როგორ უნდა შეივსოს ტუმბო და მოცემულია უსაფრთხოების ინსტრუქციები.

თქვენი Intera 3000 ტუმბოს შესახებ

მედიკამენტს მიიღებთ Intera 3000 ღვიძლის არტერიის ტუმბოს მეშვეობით. ღვიძლის არტერიის ტუმბო არის პატარა, მრგვალი მოწყობილობა, რომელიც დამზადებულია ტიტანის ლითონისგან. მისი სიგანე დაახლოებით 2-3 დუიმია, სისქე დაახლოებით 1 დუიმი და იწონის დაახლოებით 4 უნციას. ის დაახლოებით ჰოკეის შაიბის ზომისაა.

ღვიძლის არტერიის ტუმბოს აქვს 4 ძირითადი ნაწილი (იხ. სურათი 1).

• სეპტუმი არის აწეული ადგილი ტუმბოს ცენტრში. თქვენი წამალი ტუმბოში სეპტუმის (საცობის) გავლით შეიყვანება.
• შიდა კამერაში თქვენი წამალი ინახება.
• გარე პარკუჭში მოთავსებულია სითხე, რომელსაც პროპელანტი ეწოდება.
• კათეტერი არის პატარა, მოქნილი მილი. იგი ტუმბოს ღვიძლის არტერიასთან (მთავარი სისხლძარღვი, რომელიც შედის ღვიძლში) აკავშირებს.

ღვიძლის არტერიის ტუმბოს ჩაგიდგამენ (ქირურგიულად) მუცელში, ღვიძლთან ახლოს (იხ. სურათი 2). როდესაც მამოძრავებელი ნივთიერება თქვენი სხეულის ტემპერატურით გათბება, ეს გამოიწვევს წამლის შიდა კამერიდან გამოსვლას, კათეტერში გავლას და პირდაპირ თქვენს ღვიძლში, ღვიძლის არტერიის მეშვეობით მოხვედრას.

ღვიძლის არტერიის ტუმბოთი მედიკამენტის მიღება შესაძლებელია 2 გზით:

• ერთი და იგივე ტემპით, მუდმივად. ასე იღებენ, როგორც წესი.
• ერთჯერადი ინექციით (ნემსით გაკეთებული დოზით), რომელსაც ბოლუსი ეწოდება. ბოლუსის მეთოდით, მედიკამენტი არ ინახება თქვენი ტუმბოს შიდა კამერაში.

როგორ ხდება თქვენში ტუმბოს იმპლანტაცია

თქვენ გაგიკეთდებათ ღვიძლის არტერიის ტუმბოს იმპლანტაციის ოპერაცია. თქვენი ექთანი მოგაწვდით დამატებით ინფორმაციას ოპერაციის შესახებ და გეტყვით, თუ როგორ მოემზადოთ მისთვის.

ოპერაციის დაწყებამდე გაგიკეთებენ ზოგად ანესთეზიას (წამალი, რომელიც დაგაძინებთ). როდესაც დაიძინებთ, ჯანდაცვის პროვაიდერი გააკეთებს მცირე ჭრილობას (ქირურგიულ ჭრილობას) მუცლის ქვედა ნაწილში. გააკეთებენ ღრუს კანსა და კუნთს შორის და ამ ღრუში განათავსებენ ღვიძლის არტერიის ტუმბოს. შემდეგ ტუმბოს კათეტერს ღვიძლის არტერიაში მოათავსებენ.

ოპერაციას დაახლოებით 1½-დან 2 საათამდე დასჭირდება. თუ სხვა პროცედურებსაც იკეთებთ, შეიძლება მეტი დრო დასჭირდეს. ოპერაციის შემდეგ, საავადმყოფოში 1-დან-3 დღემდე დარჩებით, თუ თქვენი ჯანდაცვის პროვაიდერი სხვაგვარად არ გეტყვით.

თქვენი ექიმი ან სტაციონარული ექთანი გადმოგცემთ საიდენტიფიკაციო ბარათს, რომელზეც წერია, რომ თქვენ გაქვთ იმპლანტირებული მოწყობილობა. ეს ბარათი ყოველთვის თან უნდა ატაროთ ტუმბოს ტარების დროს, როგორც საავადმყოფოში, ასევე სახლში.

თქვენი ნაკადის სკანირების შესახებ

სანამ ღვიძლის არტერიის ტუმბოს გამოყენებას დაიწყებთ, ჩაგიტარდებათ პროცედურა, რომელსაც ეწოდება მიმოქცევის სკანირება, რათა დარწმუნდეთ, რომ თქვენი ტუმბო სწორად მუშაობს. მიმოქცევის სკანირება მოხდება ტუმბოს იმპლანტაციის შემდეგ, საავადმყოფოში ყოფნის განმავლობაში. ექთანი მოგაწვდით დამატებით ინფორმაციას ამ პროცედურის შესახებ, მის დაწყებამდე.

ნაკადის სკანირების შემდეგ, ექთანი ტუმბოს მედიკამენტით შეავსებს. თქვენი ექთანი მოგაწვდით ინფორმაციას მედიკამენტისა და მისი შესაძლო გვერდითი ეფექტების შესახებ.

ტუმბოს ჩადგმის შემდეგ თქვენ გექნებათ კუჭის წყლულების (კუჭის ლორწოვანი გარსის წყლულების) უფრო მაღალი რისკი. ამის მიზეზია კათეტერი რომელიც კუჭთან ახლოს არის და შეუძლია მისი გაღიზიანება. მკურნალობის დროს თქვენი ექთანი მოგცემთ მედიკამენტებს, რათა ეს თავიდან აიცილოთ.

ტუმბოს გამოყენების უსაფრთხოების წესები

ჩვეულებრივ, ღვიძლის არტერიის ტუმბოს განთავსების ოპერაციის შემდეგ გამოჯანმრთელებას დაახლოებით 4 კვირა სჭირდება. გამოჯანმრთელების შემდეგ, შეგიძლიათ დაუბრუნდეთ თქვენი ჩვეული საქმიანობის უმეტესობას. მაგრამ არის გარკვეული აქტივობები, რომლებსაც უნდა ერიდოთ. მიჰყევით ქვემოთ მოცემულ რეკომენდაციებს. ესაუბრეთ თქვენს ჯანდაცვის პროვაიდერს, თუ გაქვთ რაიმე კითხვა.

• მოერიდეთ უხეშ ფიზიკურ აქტივობებს (როგორიცაა, მაგალითად, კონტაქტური სპორტი). მათ შეუძლიათ ზიანი მიაყენონ თქვენს ტუმბოს.
• მოერიდეთ 10 ფუტზე (4,5 კილოგრამზე) მძიმე საგნების აწევას. ამან შეიძლება თქვენი ტუმბოს გადაადგილება გამოიწვიოს.
• მოერიდეთ მძიმე ვარჯიშს (როგორიცაა, მაგალითად, სირბილი ან ძუნძული). ამან შეიძლება კათეტერის გადაადგილება გამოიწვიოს.
• ტუმბოს გამოყენებისას არ მიიღოთ ალკოჰოლი.
• თვითმფრინავით მგზავრობამდე მიმართეთ თქვენს ჯანდაცვის პროვაიდერს. კაბინაში წნევის ცვლილებამ შეიძლება გამოიწვიოს თქვენი წამლის უფრო სწრაფი დინება.
• მოერიდეთ ღრმა ზღვას ან აკვალანგით ყვინთვას. ცურვა ან სნორკელინგი შეგიძლიათ.
• მოერიდეთ აქტივობებს, რომლებმაც შეიძლება გაზარდოს სხეულის ტემპერატურა. მათ შეუძლიათ გამოიწვიონ თქვენი წამლის უფრო სწრაფად გადინება. არ:
  • დაიდოთ გასათბობი ბალიშები, ელექტრო საბნები ან ცხელი წყლის ბოთლები პირდაპირ ტუმბოს ადგილზე.
  • წახვიდეთ საუნაში ან ჩაწვეთ ცხელ აბაზანაში.

თქვენი ღვიძლის არტერიის ტუმბო მხოლოდ 14 დღის (2 კვირის) განმავლობაში შეინარჩუნებს საკმარის მედიკამენტს. ის ^მე-14 დღეს უნდა შეივსოს. ძალიან მნიშვნელოვანია, რომ მიხვიდეთ ტუმბოს შევსების ყველა შეხვედრაზე. თუ მას რეგულარულად არ შეავსებთ, ტუმბო შეიძლება გამოშრეს. ამ შემთხვევაში იგი თრომბებით დაიბლოკება და დაზიანდება.

• დაურეკეთ თქვენს ჯანდაცვის პროვაიდერს, თუ ვერ მიდიხართ შევსების შეხვედრაზე.
• უთხარით ჯანდაცვის პროვაიდერს, თუ აპირებთ ქალაქგარეთ გასვლას ნებისმიერ დროს, სანამ ტუმბოს ატარებთ.

ტუმბოს შესავსებად შეგიძლიათ მიხვიდეთ MSK-ში ან ეწვიოთ თქვენს ადგილობრივ პროვაიდერს.

როდესაც მედიკამენტს არ იღებთ, თქვენი ტუმბო გლიცერინით იქნება სავსე. გლიცეროლი სქელი ხსნარია, რომელიც ტუმბოს შევსებებს შორის 8-დან 12 კვირამდე ინტერვალს გაძლევთ.

როგორ ივსება ტუმბო

ღვიძლის არტერიის ტუმბოს შევსების პროცედურას 10-დან 15 წუთამდე დასჭირდება.

პირველ რიგში, ექთანი გაგიწმენდთ კანს, რომელიც ფარავს ტუმბოს. შემდეგ სეპტუმში, კანის გავლით, ჩაუშვებს თხელ მილზე მიმაგრებულ ნემსს (იხ. სურათი 3). ნემსის ჩხვლეტა შეიძლება არასასიამოვნო იყოს.

როდის უნდა დარეკოთ ჯანდაცვის პროვაიდერთან

დაურეკეთ თქვენს ექიმს, თუ:

• გაქვთ სიცხე 100,4 °F (38 °C) ან უფრო მაღალი.
• გაქვთ ინფექციის რაიმე ნიშანი ტუმბოს ადგილზე, როგორიცაა მაგალითად, გაზრდილი მგრძნობელობა, გამონაჟონი ან სიწითლე.
• გაქვთ შეშუპება ტუმბოს ადგილზე.
• გეგმავთ თვითმფრინავით მგზავრობას.
• აპირებთ დაგეგმილი შევსების შეხვედრის გამოტოვებას.
• გაქვთ მუქი ფერის შარდი ან სიყვითლე (თვალების ან კანის გაყვითლება).
• გაქვთ რაიმე აუხსნელი ან უჩვეულო რეაქცია.