ਆਪਣੀ ਦਵਾਈ ਸੁਰੱਖਿਅਤ ਤਰੀਕੇ ਨਾਲ ਕਿਵੇਂ ਲੈਣੀ ਹੈ?

ਇਹ ਜਾਣਕਾਰੀ ਦੱਸਦੀ ਹੈ ਕਿ ਹਸਪਤਾਲ ਤੋਂ ਛੁੱਟੀ ਮਿਲਣ (ਘਰ ਜਾਣ) ਤੋਂ ਬਾਅਦ ਆਪਣੀ ਦਵਾਈ ਸੁਰੱਖਿਅਤ ਢੰਗ ਨਾਲ ਕਿਵੇਂ ਲੈਣੀ ਹੈ।

ਆਪਣੀ ਦਵਾਈ ਦੀ ਕੋਈ ਖੁਰਾਕ ਨਾ ਲੈਣਾ ਜਾਂ ਵਾਧੂ ਖੁਰਾਕ ਲੈਣਾ ਖ਼ਤਰਨਾਕ ਹੋ ਸਕਦਾ ਹੈ। ਆਪਣੀ ਦਵਾਈ ਹਮੇਸ਼ਾ ਸਹੀ ਤਰੀਕੇ ਨਾਲ, ਸਹੀ ਸਮੇਂ ’ਤੇ ਅਤੇ ਸਹੀ ਖੁਰਾਕਾਂ ’ਤੇ ਲਓ।

ਹਸਪਤਾਲ ਤੋਂ ਛੁੱਟੀ ਮਿਲਣ ਤੋਂ ਪਹਿਲਾਂ ਤੁਹਾਨੂੰ ਕੀ ਕਰਨਾ ਚਾਹੀਦਾ ਹੈ?

ਆਪਣੀ ਹਰੇਕ ਦਵਾਈ ਬਾਰੇ ਇਹ ਜਾਣਨ ਦੀ ਕੋਸ਼ਿਸ਼ ਕਰੋ:

• ਹਰੇਕ ਦਵਾਈ ਦਾ ਨਾਮ।
• ਤੁਸੀਂ ਇਸਨੂੰ ਕਿਉਂ ਲੈ ਰਹੇ ਹੋ।
• ਤੁਹਾਨੂੰ ਇਸਨੂੰ ਕਿੰਨੀ ਵਾਰ ਲੈਣ ਦੀ ਲੋੜ ਹੈ।
• ਗੋਲੀ ਜਾਂ ਟੈਬਲਟ ਦੀ ਤਾਕਤ।
• ਸਹੀ ਖੁਰਾਕ ਲੈਣ ਲਈ ਤੁਹਾਨੂੰ ਕਿੰਨੀਆਂ ਗੋਲੀਆਂ ਜਾਂ ਟੈਬਲਟ ਲੈਣੀਆਂ ਚਾਹੀਦੀਆਂ ਹਨ।

ਯਕੀਨੀ ਬਣਾਓ ਕਿ ਤੁਸੀਂ:

• ਆਪਣੀ ਘਰੇਲੂ ਦਵਾਈਆਂ ਦੀ ਸੂਚੀ ਨੂੰ ਸਮਝੋ।
• ਜੇ ਤੁਸੀਂ ਇੱਕ ਗੋਲੀ ਦੀ ਵਰਤੋਂ ਕਰਨ ਦੀ ਯੋਜਨਾ ਬਣਾ ਰਹੇ ਹੋ ਤਾਂ ਇੱਕ ਪਿੱਲ ਬਾਕਸ ਨੂੰ ਕਿਵੇਂ ਭਰਨਾ ਹੈ, ਇਸ ਬਾਰੇ ਜਾਣੋ।
• ਜਾਣੋ ਕਿ ਆਪਣੀਆਂ ਦਵਾਈਆਂ ਦੀਆਂ ਬੋਤਲਾਂ ਉੱਤੇ ਲੱਗੇ ਲੇਬਲਾਂ ਨੂੰ ਕਿਵੇਂ ਪੜ੍ਹਨਾ ਹੈ।

ਇਹ ਮਦਦਗਾਰ ਹੈ ਜੇਕਰ ਤੁਹਾਡਾ ਦੇਖਭਾਲ ਕਰਨ ਵਾਲਾ ਤੁਹਾਡੇ ਨਾਲ ਸਿੱਖਦਾ ਹੈ ਤਾਂ ਲੋੜ ਪੈਣ ’ਤੇ ਉਹ ਤੁਹਾਡੀ ਮਦਦ ਕਰ ਸਕੇਗਾ। ਭਾਵੇਂ ਤੁਹਾਨੂੰ ਆਪਣੀਆਂ ਦਵਾਈਆਂ ਖ਼ੁਦ ਸੰਭਾਲਣ ਦਾ ਪੂਰਾ ਭਰੋਸਾ ਹੋਵੇ, ਫਿਰ ਵੀ ਉਹ ਅਜਿਹਾ ਕਰ ਸਕਦੇ ਹਨ।

ਹਸਪਤਾਲ ਤੋਂ ਛੁੱਟੀ ਮਿਲਣ ਤੋਂ ਬਾਅਦ ਤੁਹਾਨੂੰ ਕੀ ਕਰਨਾ ਚਾਹੀਦਾ ਹੈ?

ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨਾਲ ਗੱਲ ਕਰਨ ਤੋਂ ਪਹਿਲਾਂ ਕਦੇ ਵੀ ਆਪਣੀ ਕੋਈ ਦਵਾਈ ਲੈਣੀ ਬੰਦ ਨਾ ਕਰੋ। ਕੋਈ ਹੋਰ ਦਵਾਈ ਉਦੋਂ ਤੱਕ ਨਾ ਲਓ, ਜਦੋਂ ਤੱਕ ਤੁਹਾਡਾ ਸਿਹਤ ਸੰਭਾਲ ਪ੍ਰਦਾਤਾ ਤੁਹਾਨੂੰ ਇਹ ਨਾ ਦੱਸੇ ਕਿ ਉਸ ਨੂੰ ਲੈਣਾ ਸੁਰੱਖਿਅਤ ਹੈ। ਇਸ ਵਿੱਚ ਖੁਰਾਕ ਪੂਰਕ, ਜਿਵੇਂ ਕਿ ਹਰਬਲ ਪੂਰਕ, ਵਿਟਾਮਿਨ ਤੇ ਖਣਿਜ, ਅਤੇ ਓਵਰ-ਦੀ-ਕਾਊਂਟਰ ਦਵਾਈਆਂ (ਉਹ ਦਵਾਈਆਂ ਜੋ ਤੁਸੀਂ ਡਾਕਟਰ ਦੀ ਪਰਚੀ ਤੋਂ ਬਿਨਾਂ ਲੈ ਸਕਦੇ ਹੋ) ਸ਼ਾਮਲ ਹਨ।

ਆਪਣੀਆਂ ਸਾਰੀਆਂ ਮੁਲਾਕਾਤਾਂ ਲਈ ਆਪਣੀ ਘਰੇਲੂ ਦਵਾਈਆਂ ਦੀ ਸੂਚੀ ਲਿਆਓ। ਯਕੀਨੀ ਬਣਾਓ ਕਿ ਤੁਹਾਨੂੰ ਹਰ ਫੇਰੀ ’ਤੇ ਇੱਕ ਅਪਡੇਟ ਕੀਤੀ ਸੂਚੀ ਮਿਲਦੀ ਹੈ। ਤੁਹਾਡੀ ਦੇਖਭਾਲ ਟੀਮ ਦਾ ਕੋਈ ਮੈਂਬਰ ਤੁਹਾਨੂੰ ਇਹ ਦੇਵੇਗਾ। ਆਪਣੀਆਂ ਪੁਰਾਣੀਆਂ ਘਰੇਲੂ ਦਵਾਈਆਂ ਦੀਆਂ ਸੂਚੀਆਂ ਨੂੰ ਸੁੱਟ ਦਿਓ ਤਾਂ ਜੋ ਉਹ ਤੁਹਾਡੀ ਮੌਜੂਦਾ ਸੂਚੀ ਨਾਲ ਰਲ ਨਾ ਜਾਣ।

ਤੁਹਾਡਾ ਸਿਹਤ ਸੰਭਾਲ ਪ੍ਰਦਾਤਾ ਤੁਹਾਡੀਆਂ ਮੁਲਾਕਾਤਾਂ ਦੇ ਵਿਚਕਾਰ ਤੁਹਾਡੀ ਦਵਾਈ ਦੀ ਖੁਰਾਕ ਜਾਂ ਦਵਾਈ ਲੈਣ ਦਾ ਸਮਾਂ ਬਦਲ ਸਕਦਾ ਹੈ। ਜੇਕਰ ਉਹ ਅਜਿਹਾ ਕਰਦੇ ਹਨ, ਤਾਂ ਆਪਣੀ ਘਰੇਲੂ ਦਵਾਈਆਂ ਦੀ ਸੂਚੀ ਵਿੱਚ ਤਬਦੀਲੀ ਲਿਖੋ।

ਆਪਣੀ ਦਵਾਈ ਲਓ

ਤੁਹਾਡੀ ਘਰੇਲੂ ਦਵਾਈਆਂ ਦੀ ਸੂਚੀ ’ਤੇ ਦਿੱਤੀਆਂ ਹਦਾਇਤਾਂ ਬੋਤਲਾਂ ’ਤੇ ਦਿੱਤੀਆਂ ਹਦਾਇਤਾਂ ਨਾਲੋਂ ਵੱਖਰੀਆਂ ਹੋ ਸਕਦੀਆਂ ਹਨ। ਇਹ ਉਦੋਂ ਹੋ ਸਕਦਾ ਹੈ ਜੇ ਤੁਹਾਡੀ ਦੇਖਭਾਲ ਟੀਮ ਤੁਹਾਡੀ ਦਵਾਈ ਦੀ ਖੁਰਾਕ ਜਾਂ ਦਵਾਈ ਲੈਣ ਦਾ ਸਮਾਂ, ਤੁਹਾਡੇ ਵੱਲੋਂ ਦਵਾਈ ਦੁਬਾਰਾ ਭਰਵਾਉਣ ਨਾਲੋਂ ਜ਼ਿਆਦਾ ਵਾਰ ਬਦਲਦੀ ਹੈ।

ਹਮੇਸ਼ਾ ਆਪਣੀ ਘਰੇਲੂ ਦਵਾਈ ਸੂਚੀ ’ਤੇ ਦਿੱਤੀਆਂ ਹਿਦਾਇਤਾਂ ਦੀ ਪਾਲਣਾ ਕਰੋ, ਨਾ ਕਿ ਦਵਾਈ ਦੀਆਂ ਬੋਤਲਾਂ ’ਤੇ ਦਿੱਤੀਆਂ ਹਿਦਾਇਤਾਂ ਦੀ। ਤੁਹਾਡੀ ਘਰੇਲੂ ਦਵਾਈ ਸੂਚੀ ਵਿੱਚ ਤੁਹਾਡੀਆਂ ਦਵਾਈਆਂ ਬਾਰੇ ਸਭ ਤੋਂ ਨਵੀਂ ਜਾਣਕਾਰੀ ਹੈ।

ਆਪਣੀਆਂ ਦਵਾਈਆਂ ਲੈਣੀਆਂ ਯਾਦ ਰੱਖਣ ਲਈ ਰੀਮਾਈਂਡਰ ਸੈਟ ਕਰੋ। ਅਲਾਰਮ ਘੜੀਆਂ, ਟਾਈਮਰ ਜਾਂ ਸਮਾਰਟ ਘੜੀ ਦੀ ਵਰਤੋਂ ਕਰੋ। ਭੋਜਨ ਦੇ ਸਮੇਂ ਅਨੁਸਾਰ ਆਪਣੀ ਦਵਾਈ ਦੀਆਂ ਖੁਰਾਕਾਂ ਲੈਣ ਦੀ ਯੋਜਨਾ ਬਣਾਉਣਾ ਵੀ ਮਦਦਗਾਰ ਹੋ ਸਕਦਾ ਹੈ।

• ਮਤਲੀ ਰੋਕਣ ਵਾਲੀ ਦਵਾਈ ਲਓ। ਆਪਣੀਆਂ ਹੋਰ ਦਵਾਈਆਂ ਲੈਣ ਤੋਂ 30 ਮਿੰਟ ਪਹਿਲਾਂ ਇਹ ਦਵਾਈ ਲਓ।
• ਕੁਝ ਦਵਾਈਆਂ ਨੂੰ ਭੋਜਨ ਨਾਲ ਲੈਣਾ ਸੁਰੱਖਿਅਤ ਹੁੰਦਾ ਹੈ। ਇਹ ਦਵਾਈਆਂ ਲੈਣ ਤੋਂ ਠੀਕ ਪਹਿਲਾਂ ਜਾਂ ਇਨ੍ਹਾਂ ਨੂੰ ਲੈਂਦੇ ਸਮੇਂ ਭੋਜਨ ਜਾਂ ਹਲਕਾ ਨਾਸ਼ਤਾ ਕਰੋ।
• ਤੁਹਾਨੂੰ ਆਪਣੀਆਂ ਕੁਝ ਦਵਾਈਆਂ ਖਾਲੀ ਪੇਟ ਲੈਣ ਦੀ ਲੋੜ ਹੋ ਸਕਦੀ ਹੈ। ਇਹ ਦਵਾਈਆਂ ਲੈਣ ਤੋਂ ਪਹਿਲਾਂ ਜਾਂ ਇਨ੍ਹਾਂ ਨੂੰ ਲੈਂਦੇ ਸਮੇਂ ਕੁਝ ਨਾ ਖਾਓ। ਆਪਣੀ ਘਰੇਲੂ ਦਵਾਈਆਂ ਦੀ ਸੂਚੀ ਜਾਂ ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਦੀਆਂ ਹਦਾਇਤਾਂ ਦੀ ਪਾਲਣਾ ਕਰੋ। ਆਪਣੀਆਂ ਹੋਰ ਦਵਾਈਆਂ ਖਾਲੀ ਪੇਟ ਨਾ ਲਓ, ਖ਼ਾਸ ਕਰਕੇ ਸਵੇਰੇ ਉੱਠਦੇ ਸਾਰ।
• ਆਪਣੀਆਂ ਸਾਰੀਆਂ ਗੋਲੀਆਂ ਇੱਕੋ ਸਮੇਂ ਨਿਗਲਣ ਦੀ ਕੋਸ਼ਿਸ਼ ਨਾ ਕਰੋ, ਖ਼ਾਸ ਕਰਕੇ ਸਵੇਰੇ ਉੱਠਦੇ ਸਾਰ।

ਆਪਣੀ ਦਵਾਈ ਦੁਬਾਰਾ ਮੰਗਵਾਓ

ਆਪਣੀ ਦਵਾਈ ਖ਼ਤਮ ਨਾ ਹੋਣ ਦਿਓ। ਇਸ ਗੱਲ ਦਾ ਧਿਆਨ ਰੱਖੋ ਕਿ ਤੁਸੀਂ ਆਪਣੀ ਦਵਾਈ ਦੁਬਾਰਾ ਕਦੋਂ ਮੰਗਵਾਉਣੀ ਹੈ। ਦਵਾਈ ਖ਼ਤਮ ਹੋਣ ਤੋਂ 5 ਜਾਂ ਇਸ ਤੋਂ ਵੱਧ ਦਿਨ ਪਹਿਲਾਂ ਇਸਨੂੰ ਦੁਬਾਰਾ ਮੰਗਵਾਓ। ਕਈ ਵਾਰ, ਦਵਾਈ ਤਿਆਰ ਹੋਣ ਵਿੱਚ ਇੱਕ ਜਾਂ ਦੋ ਦਿਨ ਲੱਗ ਸਕਦੇ ਹਨ।

ਜਦੋਂ ਦਵਾਈ ਦੁਬਾਰਾ ਭਰਵਾਉਣ ਦੇ ਸਾਰੇ ਮੌਕੇ ਖ਼ਤਮ ਹੋ ਜਾਣ, ਤਾਂ ਤੁਹਾਨੂੰ ਨਵੀਂ ਡਾਕਟਰੀ ਪਰਚੀ ਦੀ ਲੋੜ ਪਵੇਗੀ। ਹੋਰ ਦਵਾਈ ਲੈਣ ਲਈ ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨੂੰ ਨਵੀਂ ਡਾਕਟਰੀ ਪਰਚੀ ਲਿਖਣ ਲਈ ਕਹੋ।

ਆਪਣੀਆਂ ਦਵਾਈਆਂ ਭਰਵਾਉਣ ਲਈ ਬਹੁਤ ਸਾਰੀਆਂ ਵੱਖ-ਵੱਖ ਫਾਰਮੇਸੀਆਂ ਦੀ ਵਰਤੋਂ ਨਾ ਕਰਨ ਦੀ ਕੋਸ਼ਿਸ਼ ਕਰੋ। ਕਈ ਵਾਰ, ਵੱਖੋ-ਵੱਖਰੀਆਂ ਫਾਰਮੇਸੀਆਂ ਇੱਕੋ ਦਵਾਈ ਦੇ ਵੱਖੋ-ਵੱਖਰੇ ਬ੍ਰਾਂਡ ਵਰਤਦੀਆਂ ਹਨ। ਭਾਵੇਂ ਦਵਾਈ ਇੱਕੋ ਹੀ ਹੋਵੇ, ਪਰ ਗੋਲੀਆਂ ਦੇਖਣ ਵਿੱਚ ਵੱਖਰੀਆਂ ਲੱਗ ਸਕਦੀਆਂ ਹਨ। ਇਹ ਉਲਝਣ ਵਾਲਾ ਹੋ ਸਕਦਾ ਹੈ।

ਜੇ ਤੁਹਾਡੇ ਕੋਲ ਨਿਯਮਿਤ ਤੌਰ ’ਤੇ ਲਈਆਂ ਜਾਣ ਵਾਲੀਆਂ (ਸਟੈਂਡਿੰਗ ਦਵਾਈਆਂ) ਅਤੇ ਲੋੜ ਪੈਣ ’ਤੇ ਲਈਆਂ ਜਾਣ ਵਾਲੀਆਂ (PRN) ਦਵਾਈਆਂ ਹਨ, ਤਾਂ ਉਨ੍ਹਾਂ ਨੂੰ ਵੱਖ-ਵੱਖ ਰੱਖੋ। ਉਦਾਹਰਨ ਲਈ, ਸਟੈਂਡਿੰਗ ਦਵਾਈਆਂ ਦੀਆਂ ਬੋਤਲਾਂ ਨੂੰ ਲੇਬਲ ਲੱਗੇ ਬੈਗ ਵਿੱਚ ਰੱਖੋ ਅਤੇ ਉਨ੍ਹਾਂ ਨੂੰ PRN ਦਵਾਈਆਂ ਤੋਂ ਵੱਖ ਰੱਖੋ।

• ਸਟੈਂਡਿੰਗ ਦਵਾਈਆਂ ਉਹ ਦਵਾਈਆਂ ਹੁੰਦੀਆਂ ਹਨ ਜੋ ਤੁਸੀਂ ਨਿਯਮਿਤ ਸਮੇਂ ’ਤੇ ਲੈਂਦੇ ਹੋ।
• PRN ਦਵਾਈਆਂ ਉਹ ਦਵਾਈਆਂ ਹੁੰਦੀਆਂ ਹਨ ਜੋ ਤੁਸੀਂ ਸਿਰਫ਼ ਲੋੜ ਪੈਣ ’ਤੇ ਲੈਂਦੇ ਹੋ, ਜਿਵੇਂ ਕਿ ਮਤਲੀ ਰੋਕਣ ਵਾਲੀ ਜਾਂ ਦਰਦ ਦੀ ਦਵਾਈ।

ਆਪਣੇ ਪਿੱਲ ਬਾਕਸ ਨੂੰ ਭਰੋ

ਜੇ ਤੁਸੀਂ ਪਿੱਲ ਬਾਕਸ ਵਰਤਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਹੋਰ ਜਾਣਕਾਰੀ ਲਈ ਇੱਕ ਪਿੱਲ ਬਾਕਸ (ਗੋਲੀਆਂ ਵਾਲਾ ਡੱਬਾ) ਕਿਵੇਂ ਭਰਨਾ ਹੈ ਪੜ੍ਹੋ।

ਆਪਣੀ ਦੇਖਭਾਲ ਟੀਮ ਨੂੰ ਕਦੋਂ ਫ਼ੋਨ ਕਰਨਾ ਹੈ

ਆਪਣੇ ਡਾਕਟਰ, ਨਰਸ, ਜਾਂ ਫਾਰਮਾਸਿਸਟ ਨੂੰ ਕਾਲ ਕਰੋ ਜੇਕਰ ਤੁਸੀਂ:

• ਤੁਹਾਨੂੰ ਆਪਣੀ ਦਵਾਈ ਦੁਬਾਰਾ ਮੰਗਵਾਉਣ ਦੀ ਲੋੜ ਹੋਵੇ। ਦਵਾਈ ਖ਼ਤਮ ਹੋਣ ਤੋਂ 5 ਜਾਂ ਇਸ ਤੋਂ ਵੱਧ ਦਿਨ ਪਹਿਲਾਂ ਫ਼ੋਨ ਕਰੋ।
• ਤੁਹਾਨੂੰ ਆਪਣੀ ਦਵਾਈ ਨਾਲ ਕੋਈ ਸਮੱਸਿਆ ਹੋਵੇ।
• ਤੁਹਾਡੇ ਮਨ ਵਿੱਚ ਆਪਣੀ ਦਵਾਈ ਬਾਰੇ ਕੋਈ ਸਵਾਲ ਹੋਵੇ।