ਇਹ ਜਾਣਕਾਰੀ ਤੁਹਾਡੀ ਮਦਦ ਕਰੇਗੀ ਕਿ ਤੁਸੀਂ ਹਸਪਤਾਲ ਤੋਂ ਘਰ ਜਾਣ ਤੋਂ ਬਾਅਦ ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਦੀ ਦੇਖਭਾਲ ਕਿਵੇਂ ਕਰਨੀ ਹੈ। ਹੇਠਾਂ ਦਿੱਤੀ ਵੀਡਿਓ ਦੇਖ ਕੇ ਵੀ ਤੁਹਾਡੀ ਮਦਦ ਹੋ ਸਕਦੀ ਹੈ।
ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਬਾਰੇ
ਤੁਹਾਡੀ ਜੈਕਸਨ-ਪ੍ਰੈਟ ਡ੍ਰੇਨ ਵਿੱਚ ਇੱਕ ਨਰਮ ਪਲਾਸਟਿਕ ਦਾ ਬਲਬ ਹੁੰਦਾ ਹੈ, ਜਿਸ ਨਾਲ ਇੱਕ ਸਟੌਪਰ ਅਤੇ ਇੱਕ ਲਚਕਦਾਰ ਟਿਊਬ ਜੁੜੀ ਹੁੰਦੀ ਹੈ (ਚਿੱਤਰ 1 ਦੇਖੋ)। ਟਿਊਬ ਦਾ ਡ੍ਰੇਨੇਜ ਵਾਲਾ ਸਿਰਾ (ਚਪਟਾ ਚਿੱਟਾ ਹਿੱਸਾ) ਡ੍ਰੇਨ ਲਗਾਉਣ ਵਾਲੀ ਥਾਂ ਰਾਹੀਂ ਤੁਹਾਡੀ ਸਰਜਰੀ ਵਾਲੀ ਥਾਂ ਦੇ ਅੰਦਰ ਜਾਂਦਾ ਹੈ। ਡ੍ਰੇਨ ਲਗਾਉਣ ਵਾਲੀ ਥਾਂ ਤੁਹਾਡੇ ਚੀਰੇ ਦੇ ਨੇੜੇ ਬਣਿਆ ਇੱਕ ਛੋਟਾ ਜਿਹਾ ਛੇਦ ਜਾਂ ਸੁਰਾਖ਼ ਹੁੰਦਾ ਹੈ।
ਡ੍ਰੇਨੇਜ ਵਾਲੇ ਸਿਰੇ ਨੂੰ ਇੱਕ ਸਿਊਣ (ਟਾਂਕੇ) ਨਾਲ ਆਪਣੀ ਥਾਂ ’ਤੇ ਰੱਖਿਆ ਜਾਂਦਾ ਹੈ। ਟਿਊਬ ਦਾ ਬਾਕੀ ਹਿੱਸਾ ਤੁਹਾਡੇ ਸਰੀਰ ਤੋਂ ਬਾਹਰ ਰਹਿੰਦਾ ਹੈ ਅਤੇ ਬਲਬ ਨਾਲ ਜੁੜਿਆ ਹੁੰਦਾ ਹੈ।
ਸਟੌਪਰ ਬੰਦ ਕਰ ਕੇ ਜਦੋਂ ਬਲਬ ਨੂੰ ਦਬਾਇਆ (ਘੁੱਟਿਆ) ਜਾਂਦਾ ਹੈ, ਤਾਂ ਇਸ ਵਿੱਚ ਲਗਾਤਾਰ ਹਲਕੀ ਸਕਸ਼ਨ (ਖਿੱਚ) ਬਣੀ ਰਹਿੰਦੀ ਹੈ। ਡ੍ਰੇਨੇਜ ਖਾਲੀ ਕਰਨ ਦੇ ਸਮੇਂ ਤੋਂ ਇਲਾਵਾ, ਬਲਬ ਹਰ ਵੇਲੇ ਦਬਿਆ ਹੋਇਆ ਰਹਿਣਾ ਚਾਹੀਦਾ ਹੈ।
ਹਰੇਕ ਵਿਅਕਤੀ ਦੀ ਡ੍ਰੇਨੇਜ ਦੀ ਮਾਤਰਾ ਵੱਖ-ਵੱਖ ਹੋ ਸਕਦੀ ਹੈ। ਕੁਝ ਲੋਕਾਂ ਦੀ ਡ੍ਰੇਨੇਜ ਦੀ ਮਾਤਰਾ ਜ਼ਿਆਦਾ ਹੁੰਦੀ ਹੈ, ਜਦਕਿ ਕੁਝ ਲੋਕਾਂ ਦੀ ਘੱਟ। ਇਸ ਜਾਣਕਾਰੀ ਦੇ ਅਖੀਰ ਵਿੱਚ ਦਿੱਤੇ ਡ੍ਰੇਨੇਜ ਰਿਕਾਰਡ ਸ਼ੀਟ ਵਿੱਚ ਆਪਣੀ ਡ੍ਰੇਨੇਜ ਦੀ ਮਾਤਰਾ ਲਿਖੋ। ਆਪਣੀਆਂ ਫਾਲੋ-ਅੱਪ ਮੁਲਾਕਾਤਾਂ ’ਤੇ ਇਹ ਰਿਕਾਰਡ ਆਪਣੇ ਨਾਲ ਲੈ ਕੇ ਆਓ।
ਤੁਹਾਡੀ ਜੈਕਸਨ-ਪ੍ਰੈਟ ਡ੍ਰੇਨ ਕਿੰਨੇ ਸਮੇਂ ਤੱਕ ਤੁਹਾਡੇ ਲੱਗੀ ਰਹੇਗੀ, ਇਹ ਤੁਹਾਡੀ ਸਰਜਰੀ ਅਤੇ ਡ੍ਰੇਨੇਜ ਦੀ ਮਾਤਰਾ ’ਤੇ ਨਿਰਭਰ ਕਰਦਾ ਹੈ। ਜੇ ਪਿਛਲੇ 24 ਘੰਟਿਆਂ ਦੌਰਾਨ ਤੁਹਾਡੀ ਡ੍ਰੇਨੇਜ ਦੀ ਮਾਤਰਾ 30 ਮਿਲੀਲਿਟਰ (mL) ਜਾਂ ਇਸ ਤੋਂ ਘੱਟ ਰਹੀ ਹੋਵੇ, ਤਾਂ ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨੂੰ ਫ਼ੋਨ ਕਰੋ। ਕੁਝ ਪ੍ਰਕਿਰਿਆਵਾਂ ਲਈ ਤੁਹਾਡਾ ਸਰਜਨ ਤੁਹਾਡੀ ਜੈਕਸਨ-ਪ੍ਰੈਟ ਡ੍ਰੇਨ ਹਟਾ ਸਕਦਾ ਹੈ ਜਾਂ ਇਸ ਨੂੰ ਹੋਰ ਲੰਬੇ ਸਮੇਂ ਤੱਕ ਲੱਗੀ ਰਹਿਣ ਦੇ ਸਕਦਾ ਹੈ।
ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਦੀ ਦੇਖਭਾਲ ਕਿਵੇਂ ਕਰਨੀ ਹੈ
ਹਸਪਤਾਲ ਤੋਂ ਘਰ ਜਾਣ ਤੋਂ ਬਾਅਦ, ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਦੀ ਦੇਖਭਾਲ ਇਸ ਤਰ੍ਹਾਂ ਕਰੋ:
- ਟਿਊਬ ਵਿੱਚ ਬਣੀਆਂ ਗੰਢਾਂ ਨੂੰ ਅੱਗੇ ਵਧਾਉਣ ਲਈ ਟਿਊਬ ਨੂੰ ਦਬਾ ਕੇ ਖਿਸਕਾਓ।
- ਆਪਣੀ ਡ੍ਰੇਨ ਨੂੰ ਦਿਨ ਵਿੱਚ 2 ਵਾਰ ਖਾਲੀ ਕਰੋ। ਇੱਕ ਵਾਰ ਸਵੇਰੇ ਅਤੇ ਇੱਕ ਵਾਰ ਸ਼ਾਮ ਨੂੰ। ਇਸ ਜਾਣਕਾਰੀ ਦੇ ਅਖੀਰ ਵਿੱਚ ਦਿੱਤੇ ਜੈਕਸਨ-ਪ੍ਰੈਟ ਡ੍ਰੇਨੇਜ ਰਿਕਾਰਡ ਸ਼ੀਟ ਵਿੱਚ ਆਪਣੀ ਡ੍ਰੇਨੇਜ ਦੀ ਮਾਤਰਾ ਲਿਖੋ। ਜੇ ਤੁਹਾਡੇ 1 ਤੋਂ ਵੱਧ ਡ੍ਰੇਨਾਂ ਲੱਗੀਆਂ ਹੋਈਆਂ ਹਨ, ਤਾਂ ਹਰੇਕ ਡ੍ਰੇਨ ਵਿੱਚੋਂ ਨਿਕਲੀ ਡ੍ਰੇਨੇਜ ਦੀ ਮਾਤਰਾ ਵੱਖ-ਵੱਖ ਮਾਪੋ ਅਤੇ ਲਿਖੋ। ਇਨ੍ਹਾਂ ਨੂੰ ਜੋੜ ਕੇ ਕੁੱਲ ਮਾਤਰਾ ਨਾ ਕੱਢੋ।
- ਡ੍ਰੇਨ ਲਗਾਉਣ ਵਾਲੀ ਥਾਂ ਦੀ ਦੇਖਭਾਲ ਕਰੋ।
- ਕਿਸੇ ਵੀ ਸਮੱਸਿਆ ਦੀ ਜਾਂਚ ਕਰੋ।
ਟਿਊਬ ਨੂੰ ਦਬਾ ਕੇ ਗੰਢਾਂ ਨੂੰ ਅੱਗੇ ਵਧਾਓ
ਟਿਊਬ ਵਿੱਚ ਬਣੀਆਂ ਗੰਢਾਂ ਨੂੰ ਅੱਗੇ ਵਧਾਉਣ ਅਤੇ ਡ੍ਰੇਨੇਜ ਦਾ ਵਹਾਅ ਜਾਰੀ ਰੱਖਣ ਵਿੱਚ ਇਹ ਕਦਮ ਤੁਹਾਡੀ ਮਦਦ ਕਰਨਗੇ। ਡ੍ਰੇਨੇਜ ਨੂੰ ਖਾਲੀ ਕਰਨ ਅਤੇ ਇਸ ਦੀ ਮਾਤਰਾ ਮਾਪਣ ਲਈ ਸਟੌਪਰ ਖੋਲ੍ਹਣ ਤੋਂ ਪਹਿਲਾਂ ਟਿਊਬ ਵਿੱਚ ਬਣੀਆਂ ਗੰਢਾਂ ਨੂੰ ਅੱਗੇ ਵਧਾਓ। ਜੇ ਡ੍ਰੇਨ ਲਗਾਉਣ ਵਾਲੀ ਥਾਂ ਦੇ ਆਲੇ-ਦੁਆਲੇ ਤਰਲ ਰਿਸਦਾ ਨਜ਼ਰ ਆਵੇ, ਤਾਂ ਵੀ ਇਸੇ ਤਰ੍ਹਾਂ ਕਰੋ।
ਇਹ ਕੰਮ ਸ਼ੁਰੂ ਕਰਨ ਤੋਂ ਪਹਿਲਾਂ, ਲੋੜੀਂਦਾ ਸਾਮਾਨ ਆਪਣੇ ਕੋਲ ਰੱਖ ਲਓ। ਤੁਹਾਨੂੰ ਲੋੜ ਪਵੇਗੀ:
- ਤਰਲ ਮਾਪਣ ਵਾਲਾ ਡੱਬਾ (ਕੰਟੇਨਰ), ਜੋ ਤੁਹਾਡੀ ਨਰਸ ਨੇ ਤੁਹਾਨੂੰ ਦਿੱਤਾ ਸੀ।
- ਇਕ ਅਲਕੋਹਲ ਪੈਡ।
- ਤੁਹਾਡਾ ਜੈਕਸਨ-ਪ੍ਰੈਟ ਡ੍ਰੇਨੇਜ ਰਿਕਾਰਡ ਸ਼ੀਟ ਅਤੇ ਇੱਕ ਪੈਨ ਜਾਂ ਪੈਨਸਿਲ।
-
ਆਪਣੇ ਹੱਥ ਸਾਫ਼ ਕਰੋ।
- ਜੇਕਰ ਤੁਸੀਂ ਸਾਬਣ ਅਤੇ ਪਾਣੀ ਨਾਲ ਆਪਣੇ ਹੱਥ ਧੋ ਰਹੇ ਹੋ, ਤਾਂ ਆਪਣੇ ਹੱਥ ਗਿੱਲੇ ਕਰੋ ਅਤੇ ਉਹਨਾਂ ’ਤੇ ਸਾਬਣ ਲਗਾਓ। ਆਪਣੇ ਹੱਥਾਂ ਨੂੰ 20 ਸਕਿੰਟਾਂ ਤੱਕ ਆਪਸ ਵਿੱਚ ਰਗੜੋ, ਫਿਰ ਸਾਬਣ ਨੂੰ ਪਾਣੀ ਨਾਲ ਧੋ ਲਓ। ਆਪਣੇ ਹੱਥਾਂ ਨੂੰ ਡਿਸਪੋਸੇਬਲ ਤੌਲੀਏ ਨਾਲ ਸੁਕਾਓ। ਨਲ ਨੂੰ ਬੰਦ ਕਰਨ ਲਈ ਉਸੇ ਤੌਲੀਏ ਦੀ ਵਰਤੋਂ ਕਰੋ।
- ਜੇਕਰ ਤੁਸੀਂ ਅਲਕੋਹਲ-ਅਧਾਰਤ ਹੈਂਡ ਸੈਨੀਟਾਈਜ਼ਰ ਦੀ ਵਰਤੋਂ ਕਰ ਰਹੇ ਹੋ, ਤਾਂ ਇਸ ਨਾਲ ਆਪਣੇ ਹੱਥ ਢੱਕੋ। ਫਿਰ ਆਪਣੇ ਹੱਥਾਂ ਨੂੰ ਉਦੋਂ ਤੱਕ ਰਗੜੋ ਜਦੋਂ ਤੱਕ ਉਹ ਸੁੱਕ ਨਾ ਜਾਣ।
- ਟਿਊਬ ਨੂੰ ਸ਼ੀਸ਼ੇ ਦੀ ਮਦਦ ਨਾਲ ਦੇਖੋ। ਇਸ ਨਾਲ ਤੁਹਾਨੂੰ ਸਾਫ਼-ਸਾਫ਼ ਦਿਸੇਗਾ ਕਿ ਤੁਹਾਡੇ ਹੱਥ ਕਿੱਥੇ ਹੋਣੇ ਚਾਹੀਦੇ ਹਨ।
- ਜਿੱਥੋਂ ਟਿਊਬ ਤੁਹਾਡੀ ਚਮੜੀ ਵਿੱਚ ਜਾਂਦੀ ਹੈ, ਉਸ ਥਾਂ ਦੇ ਨੇੜੇ ਇਸ ਨੂੰ ਆਪਣੇ ਅੰਗੂਠੇ ਅਤੇ ਪਹਿਲੀ ਉਂਗਲ ਨਾਲ ਦਬਾ ਕੇ ਫੜੋ। ਟਿਊਬ ਉੱਤੇ ਆਪਣੀਆਂ ਉਂਗਲਾਂ ਨੂੰ ਆਸਾਨੀ ਨਾਲ ਹੇਠਾਂ ਵੱਲ ਖਿਸਕਾਉਣ ਲਈ ਤੁਸੀਂ ਅਲਕੋਹਲ ਵਾਈਪਾਂ ਦੀ ਵਰਤੋਂ ਕਰ ਸਕਦੇ ਹੋ। ਟਿਊਬ ਨੂੰ ਦਬਾ ਕੇ ਗੰਢਾਂ ਨੂੰ ਅੱਗੇ ਵਧਾਉਂਦੇ ਸਮੇਂ ਇਸ ਹੱਥ ਨੂੰ ਆਪਣੀ ਥਾਂ ’ਤੇ ਹੀ ਰੱਖੋ। ਇਸ ਨਾਲ ਤੁਸੀਂ ਇਹ ਯਕੀਨੀ ਬਣਾ ਸਕੋਗੇ ਕਿ ਤੁਹਾਡੀ ਚਮੜੀ ’ਤੇ ਖਿੱਚ ਨਹੀਂ ਪੈ ਰਹੀ, ਕਿਉਂਕਿ ਇਸ ਨਾਲ ਦਰਦ ਹੋ ਸਕਦਾ ਹੈ।
- ਆਪਣੇ ਦੂਜੇ ਹੱਥ ਦੇ ਅੰਗੂਠੇ ਅਤੇ ਪਹਿਲੀ ਉਂਗਲ ਨਾਲ ਟਿਊਬ ਨੂੰ ਆਪਣੀਆਂ ਦੂਜੀਆਂ ਉਂਗਲਾਂ ਦੇ ਬਿਲਕੁਲ ਹੇਠਾਂ ਦਬਾ ਕੇ ਫੜੋ। ਆਪਣੀਆਂ ਉਂਗਲਾਂ ਨੂੰ ਇਸੇ ਤਰ੍ਹਾਂ ਦਬਾ ਕੇ ਰੱਖਦੇ ਹੋਏ, ਉਨ੍ਹਾਂ ਨੂੰ ਟਿਊਬ ਉੱਤੇ ਹੇਠਾਂ ਵੱਲ ਖਿਸਕਾਓ। ਟਿਊਬ ਵਿੱਚ ਮੌਜੂਦ ਕਿਸੇ ਵੀ ਗੰਢ ਨੂੰ ਹੇਠਾਂ ਬਲਬ ਵੱਲ ਧੱਕੋ।
ਟਿਊਬ ਵਿੱਚੋਂ ਗੰਢਾਂ ਨੂੰ ਬਲਬ ਵਿੱਚ ਪਹੁੰਚਾਉਣ ਲਈ, ਕਦਮ 3 ਅਤੇ 4 ਨੂੰ ਜਿੰਨੀ ਵਾਰ ਲੋੜ ਹੋਵੇ ਓਨੀ ਵਾਰ ਦੁਹਰਾਓ। ਜੇ ਤੁਸੀਂ ਕਿਸੇ ਗੰਢ ਨੂੰ ਬਲਬ ਵਿੱਚ ਨਹੀਂ ਪਹੁੰਚਾ ਸਕਦੇ ਅਤੇ ਬਲਬ ਵਿੱਚ ਡ੍ਰੇਨੇਜ ਬਹੁਤ ਘੱਟ ਜਾਂ ਬਿਲਕੁਲ ਨਹੀਂ ਹੈ, ਤਾਂ ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨੂੰ ਫ਼ੋਨ ਕਰੋ।
ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਨੂੰ ਖਾਲੀ ਕਰੋ
ਜਿੱਦਾਂ ਹੀ ਸਾਰੀਆਂ ਗੰਢਾਂ ਬਲਬ ਵਿੱਚ ਪਹੁੰਚ ਜਾਣ, ਇਸ ਨੂੰ ਖਾਲੀ ਕਰਨ ਲਈ ਤਿਆਰ ਹੋ ਜਾਓ। ਇਹ ਯਕੀਨੀ ਬਣਾਓ ਕਿ ਤੁਹਾਡੇ ਕੋਲ ਕੰਮ ਕਰਨ ਲਈ ਇੱਕ ਸਾਫ਼-ਸੁਥਰੀ ਥਾਂ ਹੋਵੇ। ਤੁਸੀਂ ਇਹ ਆਪਣੇ ਬਾਥਰੂਮ ਵਿੱਚ ਜਾਂ ਕਿਸੇ ਅਜਿਹੀ ਥਾਂ ’ਤੇ ਕਰ ਸਕਦੇ ਹੋ, ਜਿੱਥੇ ਸਤ੍ਹਾ ਸੁੱਕੀ ਹੋਵੇ ਅਤੇ ਉਸ ’ਤੇ ਫ਼ਾਲਤੂ ਸਮਾਨ ਨਾ ਰੱਖਿਆ ਹੋਵੇ।
ਜੇ ਤੁਸੀਂ ਸਰਜੀਕਲ ਬਰਾ ਜਾਂ ਰੈਪ ਪਹਿਨ ਹੋਈ ਹੈ ਅਤੇ ਡ੍ਰੇਨੇਜ ਬਲਬ ਉਸ ਨਾਲ ਲੱਗਾ ਹੋਇਆ ਹੈ, ਤਾਂ ਇਸ ਨੂੰ ਪਹਿਲਾਂ ਉਸ ਤੋਂ ਹਟਾ ਲਓ।
ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਨੂੰ ਖਾਲੀ ਕਰਨ ਲਈ ਹੇਠਾਂ ਦਿੱਤੀਆਂ ਹਿਦਾਇਤਾਂ ਦੀ ਪਾਲਣਾ ਕਰੋ:
- ਬਲਬ ਦੇ ਉੱਪਰ ਲੱਗੇ ਸਟੌਪਰ ਨੂੰ ਖੋਲ੍ਹੋ। ਇਸ ਨਾਲ ਦਬਿਆ ਹੋਇਆ ਬਲਬ ਫੁੱਲ ਜਾਵੇਗਾ। ਸਟੌਪਰ ਦੇ ਅੰਦਰਲੇ ਹਿੱਸੇ ਜਾਂ ਬਲਬ ਦੇ ਖੁੱਲ੍ਹਣ ਵਾਲੇ ਹਿੱਸੇ ਦੇ ਅੰਦਰ ਨੂੰ ਨਾ ਛੂਹੋ।
- ਬਲਬ ਨੂੰ ਪੁੱਠਾ ਕਰੋ, ਫਿਰ ਇਸ ਨੂੰ ਹੌਲੀ-ਹੌਲੀ ਦਬਾਓ। ਡ੍ਰੇਨੇਜ ਨੂੰ ਤਰਲ ਮਾਪਣ ਵਾਲੇ ਕੰਟੇਨਰ ਵਿੱਚ ਪਾ ਦਿਓ (ਚਿੱਤਰ 2 ਦੇਖੋ)।
- ਬਲਬ ਨੂੰ ਮੁੜ ਸਿੱਧਾ ਕਰ ਲਓ। ਬਲਬ ਨੂੰ ਉਦੋਂ ਤੱਕ ਦਬਾਓ, ਜਦੋਂ ਤੱਕ ਤੁਹਾਨੂੰ ਆਪਣੀਆਂ ਉਂਗਲਾਂ ਹਥੇਲੀ ਨਾਲ ਲੱਗਦੀਆਂ ਮਹਿਸੂਸ ਨਾ ਹੋਣ। ਬਲਬ ਵਿੱਚੋਂ ਸਾਰੀ ਹਵਾ ਬਾਹਰ ਨਿਕਲ ਜਾਣੀ ਚਾਹੀਦੀ ਹੈ।
- ਸਟੌਪਰ ਨੂੰ ਵਾਪਸ ਲਗਾਉਂਦੇ ਸਮੇਂ ਬਲਬ ਨੂੰ ਦਬਾਈ ਰੱਖੋ। ਇਹ ਯਕੀਨੀ ਬਣਾਓ ਕਿ ਬਲਬ ਪੂਰੀ ਤਰ੍ਹਾਂ ਦਬਿਆ ਹੋਇਆ ਰਹੇ, ਤਾਂ ਜੋ ਇਸ ਵਿੱਚ ਲਗਾਤਾਰ ਹਲਕੀ ਸਕਸ਼ਨ (ਖਿੱਚ) ਬਣੀ ਰਹੇ। ਡ੍ਰੇਨ ਉਦੋਂ ਹੀ ਕੰਮ ਕਰੇਗੀ ਜਦੋਂ ਸਟੌਪਰ ਬੰਦ ਹੋਵੇਗਾ।
- ਜੇ ਤੁਸੀਂ ਸਰਜੀਕਲ ਬਰਾ ਜਾਂ ਰੈਪ ਪਹਿਨੀ ਹੋਈ ਹੈ, ਤਾਂ ਡ੍ਰੇਨੇਜ ਬਲਬ ਨੂੰ ਉਸ ਨਾਲ ਦੁਬਾਰਾ ਲਗਾ ਦਿਓ। ਹੇਠਾਂ ਲੱਗੇ ਪਲਾਸਟਿਕ ਦੇ ਲੂਪ ਜਾਂ ਵੈਲਕਰੋ® ਸਟ੍ਰੈਪਾਂ ਦੀ ਵਰਤੋਂ ਕਰੋ। ਡ੍ਰੇਨ ਨੂੰ ਲਟਕਣ ਨਾ ਦਿਓ। ਤੁਹਾਨੂੰ ਡ੍ਰੇਨ ਨੂੰ ਕਮਰ ਵਾਲੇ ਬੈਗ (ਫੈਨੀ ਪੈਕ ਜਾਂ ਬੈਲਟ ਬੈਗ) ਵਿੱਚ ਰੱਖਣਾ ਮਦਦਗਾਰ ਲੱਗ ਸਕਦਾ ਹੈ।
- ਮਾਪਣ ਵਾਲੇ ਕੰਟੇਨਰ ਵਿੱਚ ਡ੍ਰੇਨੇਜ ਦੀ ਮਾਤਰਾ ਅਤੇ ਉਸ ਦੇ ਰੰਗ ਦੀ ਜਾਂਚ ਕਰੋ। ਸਰਜਰੀ ਤੋਂ ਬਾਅਦ ਪਹਿਲੇ ਕੁਝ ਦਿਨਾਂ ਵਿੱਚ, ਡ੍ਰੇਨ ਵਿੱਚੋਂ ਨਿਕਲਣ ਵਾਲਾ ਤਰਲ ਗੂੜ੍ਹੇ ਲਾਲ ਰੰਗ ਦਾ ਹੋ ਸਕਦਾ ਹੈ। ਇਹ ਆਮ ਗੱਲ ਹੈ। ਜਿਵੇਂ-ਜਿਵੇਂ ਤੁਸੀਂ ਠੀਕ ਹੁੰਦੇ ਜਾਵੋਗੇ, ਡ੍ਰੇਨ ਵਿੱਚੋਂ ਨਿਕਲਣ ਵਾਲਾ ਤਰਲ ਗੁਲਾਬੀ ਜਾਂ ਫਿੱਕੇ ਪੀਲੇ ਰੰਗ ਦਾ ਹੋ ਸਕਦਾ ਹੈ।
- ਜੈਕਸਨ-ਪ੍ਰੈਟ ਡ੍ਰੇਨੇਜ ਰਿਕਾਰਡ ਸ਼ੀਟ ਵਿੱਚ ਆਪਣੀ ਡ੍ਰੇਨੇਜ ਦੀ ਮਾਤਰਾ (mL ਵਿੱਚ) ਅਤੇ ਉਸ ਦਾ ਰੰਗ ਲਿਖੋ।
- ਡ੍ਰੇਨੇਜ ਨੂੰ ਟਾਇਲਟ ਵਿੱਚ ਵਹਾ ਦਿਓ ਅਤੇ ਮਾਪਣ ਵਾਲੇ ਕੰਟੇਨਰ ਨੂੰ ਪਾਣੀ ਨਾਲ ਧੋ ਲਓ।
- ਹਰ ਦਿਨ ਦੇ ਅਖੀਰ ਵਿੱਚ, ਉਸ ਦਿਨ ਦੀ ਡ੍ਰੇਨੇਜ ਦੀ ਕੁੱਲ ਮਾਤਰਾ ਜੋੜ ਲਓ। ਡ੍ਰੇਨੇਜ ਰਿਕਾਰਡ ਸ਼ੀਟ ਦੇ ਆਖ਼ਰੀ ਕਾਲਮ ਵਿੱਚ ਇਹ ਕੁੱਲ ਮਾਤਰਾ ਲਿਖੋ। ਜੇ ਤੁਹਾਡੇ 1 ਤੋਂ ਵੱਧ ਡ੍ਰੇਨਾਂ ਲੱਗੀਆਂ ਹੋਈਆਂ ਹਨ, ਤਾਂ ਹਰੇਕ ਡ੍ਰੇਨ ਵਿੱਚੋਂ ਨਿਕਲੀ ਡ੍ਰੇਨੇਜ ਦੀ ਮਾਤਰਾ ਵੱਖ-ਵੱਖ ਮਾਪੋ ਅਤੇ ਲਿਖੋ। ਇਨ੍ਹਾਂ ਨੂੰ ਜੋੜ ਕੇ ਕੁੱਲ ਮਾਤਰਾ ਨਾ ਕੱਢੋ।
ਡ੍ਰੇਨ ਲਗਾਉਣ ਵਾਲੀ ਥਾਂ ਦੀ ਦੇਖਭਾਲ ਕਿਵੇਂ ਕਰਨੀ ਹੈ
ਇਨਫੈਕਸ਼ਨ ਦੇ ਲੱਛਣਾਂ ਦੀ ਜਾਂਚ ਕਰੋ
ਡ੍ਰੇਨੇਜ ਖਾਲੀ ਕਰਨ ਤੋਂ ਬਾਅਦ, ਆਪਣੇ ਹੱਥ ਦੁਬਾਰਾ ਸਾਫ਼ ਕਰੋ। ਡ੍ਰੇਨ ਲਗਾਉਣ ਵਾਲੀ ਥਾਂ ਦੇ ਆਲੇ-ਦੁਆਲੇ ਇਨਫੈਕਸ਼ਨ ਦੇ ਲੱਛਣਾਂ ਦੀ ਜਾਂਚ ਕਰੋ, ਜਿਵੇਂ ਕਿ:
- ਦਬਾਉਣ ਜਾਂ ਛੂਹਣ ’ਤੇ ਦਰਦ।
- ਸੋਜ।
- ਪੀਪ।
- ਗਰਮਾਹਟ।
- ਆਮ ਨਾਲੋਂ ਵੱਧ ਲਾਲੀ। ਕਈ ਵਾਰ ਡ੍ਰੇਨ ਲਗਾਉਣ ਵਾਲੀ ਥਾਂ ’ਤੇ ਇੱਕ ਛੋਟੇ ਸਿੱਕੇ ਜਿੰਨੀ ਲਾਲੀ ਹੋ ਸਕਦੀ ਹੈ। ਇਹ ਆਮ ਗੱਲ ਹੈ।
ਜੇ ਤੁਹਾਨੂੰ ਉੱਪਰ ਦੱਸੇ ਲੱਛਣਾਂ ਵਿੱਚੋਂ ਕੋਈ ਵੀ ਲੱਛਣ ਨਜ਼ਰ ਆਵੇ ਜਾਂ 101°F (38.3°C) ਜਾਂ ਇਸ ਤੋਂ ਵੱਧ ਬੁਖ਼ਾਰ ਹੋਵੇ, ਤਾਂ ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨੂੰ ਫ਼ੋਨ ਕਰੋ। ਹੋ ਸਕਦਾ ਹੈ ਕਿ ਉਹ ਤੁਹਾਨੂੰ ਡ੍ਰੇਨ ਲਗਾਉਣ ਵਾਲੀ ਥਾਂ ਉੱਤੇ ਪੱਟੀ ਲਗਾਉਣ ਲਈ ਕਹਿਣ।
ਡ੍ਰੇਨ ਲਗਾਉਣ ਵਾਲੀ ਥਾਂ ਨੂੰ ਸਾਫ਼ ਰੱਖੋ।
ਡ੍ਰੇਨ ਲਗਾਉਣ ਵਾਲੀ ਥਾਂ ਨੂੰ ਸਾਬਣ ਅਤੇ ਪਾਣੀ ਨਾਲ ਧੋ ਕੇ, ਉਸ ਨੂੰ ਹੌਲੀ-ਹੌਲੀ ਥੱਪਥਪਾ ਕੇ ਸੁਕਾਓ, ਤਾਂ ਜੋ ਇਹ ਸਾਫ਼ ਅਤੇ ਸੁੱਕੀ ਰਹੇ।
ਜੈਕਸਨ-ਪ੍ਰੈਟ ਡ੍ਰੇਨ ਨਾਲ ਹੋਣ ਵਾਲੀਆਂ ਆਮ ਸਮੱਸਿਆਵਾਂ
ਸਮੱਸਿਆ
| ਕਾਰਨ
ਕੀ ਕਰਨਾ ਹੈ
|
ਸਮੱਸਿਆ
| ਕਾਰਨ
ਕੀ ਕਰਨਾ ਹੈ
|
ਸਮੱਸਿਆ
| ਕਾਰਨ
ਕੀ ਕਰਨਾ ਹੈ
|
ਸਮੱਸਿਆ
| ਕਾਰਨ
ਕੀ ਕਰਨਾ ਹੈ
|
ਜਦੋਂ ਤੁਸੀਂ ਪਹਿਲੀ ਵਾਰ ਆਪਣੀ ਡ੍ਰੇਨੇਜ ਖਾਲੀ ਕਰੋਗੇ, ਤਾਂ ਤੁਹਾਡੀ ਨਰਸ ਇਹ ਦੇਖੇਗੀ ਕਿ ਤੁਸੀਂ ਇਹ ਸਹੀ ਤਰੀਕੇ ਨਾਲ ਕਰ ਰਹੇ ਹੋ ਜਾਂ ਨਹੀਂ। ਇੱਕ ਵਾਰ ਜਦੋਂ ਤੁਸੀਂ ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਦੀ ਦੇਖਭਾਲ ਕਰਨੀ ਸਿੱਖ ਲਓਗੇ, ਤਾਂ ਤੁਸੀਂ ਇਹ ਖ਼ੁਦ ਕਰ ਸਕੋਗੇ। ਇਸ ਦੀ ਦੇਖਭਾਲ ਖ਼ੁਦ ਸ਼ੁਰੂ ਕਰਨ ਤੋਂ ਬਾਅਦ ਵੀ ਤੁਸੀਂ ਹਮੇਸ਼ਾ ਮਦਦ ਮੰਗ ਸਕਦੇ ਹੋ। ਜੇ ਤੁਹਾਨੂੰ ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਦੀ ਦੇਖਭਾਲ ਕਰਨ ਵਿੱਚ ਕੋਈ ਸਮੱਸਿਆ ਆਉਂਦੀ ਹੈ, ਤਾਂ ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨੂੰ ਫ਼ੋਨ ਕਰੋ।
ਡ੍ਰੇਨ ਹਟਾਏ ਜਾਣ ਤੋਂ ਬਾਅਦ ਆਪਣੀ ਚਮੜੀ ਦੀ ਦੇਖਭਾਲ ਕਿਵੇਂ ਕਰਨੀ ਹੈ
ਤੁਹਾਡਾ ਸਿਹਤ ਸੰਭਾਲ ਪ੍ਰਦਾਤਾ ਤੁਹਾਡੀ ਡ੍ਰੇਨ ਹਟਾ ਦੇਵੇਗਾ। ਉਹ ਉਸ ਥਾਂ ਉੱਤੇ ਪੱਟੀ ਲਗਾ ਦੇਣਗੇ, ਜਿੱਥੇ ਡ੍ਰੇਨ ਲੱਗੀ ਹੋਈ ਸੀ। ਜਿੱਥੇ ਡ੍ਰੇਨ ਲੱਗੀ ਹੋਈ ਸੀ ਅਤੇ ਉਸ ਦੇ ਆਲੇ-ਦੁਆਲੇ ਦੇ ਹਿੱਸੇ ਨੂੰ ਸਾਫ਼ ਅਤੇ ਸੁੱਕਾ ਰੱਖੋ। ਇਸ ਨਾਲ ਤੁਹਾਡੀ ਚਮੜੀ ਨੂੰ ਠੀਕ ਹੋਣ ਵਿੱਚ ਮਦਦ ਮਿਲੇਗੀ ਅਤੇ ਇਨਫੈਕਸ਼ਨ ਤੋਂ ਬਚਾਅ ਹੋਵੇਗਾ।
ਜੇ ਤੁਹਾਡੀ ਰੀਕੰਸਟ੍ਰਕਟਿਵ ਸਰਜਰੀ ਹੋਈ ਹੈ, ਤਾਂ ਡ੍ਰੇਨ ਹਟਾਏ ਜਾਣ ਤੋਂ ਬਾਅਦ ਤੁਹਾਡੀ ਚਮੜੀ ਦੀ ਦੇਖਭਾਲ ਕਰਨ ਦਾ ਤਰੀਕਾ ਵੱਖਰਾ ਹੋਵੇਗਾ।
ਰੀਕੰਸਟ੍ਰਕਟਿਵ ਸਰਜਰੀ ਤੋਂ ਬਿਨਾਂ ਆਪਣੀ ਚਮੜੀ ਦੀ ਦੇਖਭਾਲ ਕਰਨੀ
ਜੇ ਤੁਹਾਡੀ ਰੀਕੰਸਟ੍ਰਕਟਿਵ ਸਰਜਰੀ ਨਹੀਂ ਹੋਈ, ਤਾਂ ਡ੍ਰੇਨ ਹਟਾਏ ਜਾਣ ਤੋਂ ਬਾਅਦ ਇਨ੍ਹਾਂ ਹਿਦਾਇਤਾਂ ਦੀ ਪਾਲਣਾ ਕਰੋ:
- 24 ਘੰਟਿਆਂ ਬਾਅਦ ਪੱਟੀ ਹਟਾ ਦਿਓ।
- ਜਦੋਂ ਤੱਕ ਤੁਹਾਡਾ ਚੀਰਾ ਪੂਰੀ ਤਰ੍ਹਾਂ ਬੰਦ ਨਾ ਹੋ ਜਾਵੇ ਅਤੇ ਡ੍ਰੇਨੇਜ ਆਉਣੀ ਬੰਦ ਨਾ ਹੋ ਜਾਵੇ, ਉਦੋਂ ਤੱਕ ਚੀਰੇ ਵਾਲੀ ਥਾਂ ਨੂੰ ਪਾਣੀ ਵਿੱਚ ਨਾ ਡੁਬੋਵੋ। ਪੱਟੀ ਹਟਾਉਣ ਤੋਂ ਬਾਅਦ ਤੁਸੀਂ ਸ਼ਾਵਰ ਲੈ ਸਕਦੇ ਹੋ, ਪਰ ਬਾਥਟੱਬ ਜਾਂ ਸਵਿਮਿੰਗ ਪੂਲ ਦੇ ਪਾਣੀ ਵਿੱਚ ਆਪਣੇ ਸਰੀਰ ਨੂੰ ਨਾ ਡੁਬੋਵੋ।
- ਉਸ ਥਾਂ ਨੂੰ ਸਾਬਣ ਨਾਲ ਹੌਲੀ-ਹੌਲੀ ਧੋਵੋ। ਉਸ ਹਿੱਸੇ ਨੂੰ ਕੋਸੇ ਪਾਣੀ ਨਾਲ ਧੋ ਲਓ, ਫਿਰ ਹੌਲੀ-ਹੌਲੀ ਥੱਪਥਪਾ ਕੇ ਸੁਕਾਓ।
-
ਉਸ ਥਾਂ ਦੀ ਜਾਂਚ ਕਰੋ ਅਤੇ ਜੇ ਲੋੜ ਪਵੇ, ਤਾਂ ਸ਼ੀਸ਼ੇ ਦੀ ਵਰਤੋਂ ਕਰੋ। ਹੇਠ ਲਿਖੇ ਲੱਛਣ ਆਮ ਹਨ:
- ਹਲਕੀ ਲਾਲੀ।
- ਹਲਕੀ ਸੋਜ।
- ਦਬਾਉਣ ਜਾਂ ਛੂਹਣ ’ਤੇ ਦਰਦ।
- ਗਾਜ਼ ਪੈਡ ਉੱਤੇ ਥੋੜ੍ਹੀ ਜਿਹੀ ਸਾਫ਼ ਜਾਂ ਹਲਕੇ ਖੂਨ ਵਾਲੀ ਡ੍ਰੇਨੇਜ।
ਰੀਕੰਸਟ੍ਰਕਟਿਵ ਸਰਜਰੀ ਤੋਂ ਬਾਅਦ ਆਪਣੀ ਚਮੜੀ ਦੀ ਦੇਖਭਾਲ ਕਰਨੀ
ਜੇ ਤੁਹਾਡੀ ਰੀਕੰਸਟ੍ਰਕਟਿਵ ਸਰਜਰੀ ਹੋਈ ਹੈ, ਤਾਂ ਡ੍ਰੇਨ ਹਟਾਏ ਜਾਣ ਤੋਂ ਬਾਅਦ ਇਨ੍ਹਾਂ ਹਿਦਾਇਤਾਂ ਦੀ ਪਾਲਣਾ ਕਰੋ।
- ਲੋੜ ਅਨੁਸਾਰ ਹਰ 12 ਘੰਟਿਆਂ ਬਾਅਦ ਪੱਟੀ ਬਦਲੋ।
-
ਤੁਹਾਡਾ ਸਰਜਨ ਤੁਹਾਨੂੰ ਦੱਸੇਗਾ ਕਿ ਡ੍ਰੇਨ ਹਟਾਏ ਜਾਣ ਤੋਂ ਕਿੰਨੇ ਸਮਾਂ ਬਾਅਦ ਤੁਸੀਂ ਸ਼ਾਵਰ ਲੈ ਸਕਦੇ ਹੋ।
- ਆਪਣੀ ਰੀਕੰਸਟ੍ਰਕਟਿਵ ਸਰਜਰੀ ਤੋਂ ਬਾਅਦ 4 ਤੋਂ 6 ਹਫ਼ਤਿਆਂ ਤੱਕ ਆਪਣੇ ਚੀਰੇ ਵਾਲੀ ਥਾਂ ਨੂੰ ਪਾਣੀ ਵਿੱਚ ਨਾ ਡੁਬੋਵੋ। ਨਹਾਉਣ ਲਈ ਟੱਬ ਵਿੱਚ ਨਾ ਬੈਠੋ ਅਤੇ ਨਾ ਹੀ ਇਸ ਹਿੱਸੇ ਨੂੰ ਪਾਣੀ ਵਿੱਚ ਡੁਬੋਵੋ, ਜਿਵੇਂ ਕਿ ਬਾਥਟੱਬ ਜਾਂ ਸਵਿਮਿੰਗ ਪੂਲ ਵਿੱਚ। ਹੋਰ ਜਾਣਕਾਰੀ ਲਈ ਇਹ How To Care for Your Jackson-Pratt Drain ਵੀਡੀਓ ਦੇਖੋ।
- ਉਸ ਥਾਂ ਨੂੰ ਸਾਬਣ ਨਾਲ ਹੌਲੀ-ਹੌਲੀ ਧੋਵੋ ਅਤੇ ਉਸ ਹਿੱਸੇ ਨੂੰ ਕੋਸੇ ਪਾਣੀ ਨਾਲ ਧੋ ਲਓ। ਉਸ ਹਿੱਸੇ ਨੂੰ ਹੌਲੀ-ਹੌਲੀ ਥੱਪਥਪਾ ਕੇ ਸੁਕਾਓ।
-
ਉਸ ਥਾਂ ਦੀ ਜਾਂਚ ਕਰੋ ਅਤੇ ਜੇ ਲੋੜ ਪਵੇ, ਤਾਂ ਸ਼ੀਸ਼ੇ ਦੀ ਵਰਤੋਂ ਕਰੋ। ਹੇਠ ਲਿਖੇ ਲੱਛਣ ਆਮ ਹਨ:
- ਹਲਕੀ ਲਾਲੀ।
- ਹਲਕੀ ਸੋਜ।
- ਦਬਾਉਣ ਜਾਂ ਛੂਹਣ ’ਤੇ ਦਰਦ।
- ਗਾਜ਼ ਪੈਡ ਉੱਤੇ ਥੋੜ੍ਹੀ ਜਿਹੀ ਸਾਫ਼ ਜਾਂ ਹਲਕੇ ਖੂਨ ਵਾਲੀ ਡ੍ਰੇਨੇਜ।
ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨੂੰ ਕਦੋਂ ਕਾਲ ਕਰਨੀ ਹੈ
ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨੂੰ ਤੁਰੰਤ ਕਾਲ ਕਰੋ ਜੇਕਰ:
- ਤੁਹਾਡੀ ਡ੍ਰੇਨੇਜ ਚਟਕਦਾਰ ਲਾਲ ਰੰਗ ਦੀ ਹੈ।
- ਤੁਹਾਨੂੰ 101°F (38.3°C) ਜਾਂ ਇਸ ਤੋਂ ਵੱਧ ਬੁਖ਼ਾਰ ਹੈ।
- ਡ੍ਰੇਨ ਲਗਾਉਣ ਵਾਲੀ ਥਾਂ ’ਤੇ ਲਾਲੀ, ਛੂਹਣ ’ਤੇ ਦਰਦ, ਸੋਜ, ਦਬਾਅ ਜਾਂ ਪੀਪ ਵੱਧ ਗਈ ਹੈ।
- ਸਰਜਰੀ ਵਾਲੀਆਂ ਥਾਵਾਂ ਦੇ ਆਲੇ-ਦੁਆਲੇ ਦੀ ਚਮੜੀ ਛੂਹਣ ’ਤੇ ਗਰਮ ਲੱਗਦੀ ਹੈ।
- ਤੁਸੀਂ ਗੰਢ ਨੂੰ ਬਲਬ ਵਿੱਚ ਨਹੀਂ ਪਹੁੰਚਾ ਸਕਦੇ ਅਤੇ ਬਲਬ ਵਿੱਚ ਡ੍ਰੇਨੇਜ ਬਹੁਤ ਘੱਟ ਜਾਂ ਬਿਲਕੁਲ ਨਹੀਂ ਹੈ।
ਆਪਣੇ ਸਿਹਤ ਸੰਭਾਲ ਪ੍ਰਦਾਤਾ ਨੂੰ ਸੋਮਵਾਰ ਤੋਂ ਸ਼ੁੱਕਰਵਾਰ ਸਵੇਰੇ 9 ਵਜੇ ਤੋਂ ਸ਼ਾਮ 5 ਵਜੇ ਦੇ ਵਿਚਕਾਰ ਫ਼ੋਨ ਕਰੋ, ਜੇ:
- ਪਿਛਲੇ 24 ਘੰਟਿਆਂ ਦੌਰਾਨ ਡ੍ਰੇਨੇਜ ਦੀ ਮਾਤਰਾ ਅਚਾਨਕ ਘੱਟ ਹੋ ਗਈ ਹੋਵੇ ਜਾਂ 100 mL ਵੱਧ ਗਈ ਹੋਵੇ।
- ਪਿਛਲੇ 24 ਘੰਟਿਆਂ ਦੌਰਾਨ ਤੁਹਾਡੀ ਡ੍ਰੇਨੇਜ ਦੀ ਮਾਤਰਾ 30 ਮਿਲੀਲਿਟਰ (mL) ਜਾਂ ਇਸ ਤੋਂ ਘੱਟ ਰਹੀ ਹੋਵੇ।
- ਟਿਊਬ ਡ੍ਰੇਨ ਲਗਾਉਣ ਵਾਲੀ ਥਾਂ ਤੋਂ ਬਾਹਰ ਨਿਕਲ ਜਾਂਦੀ ਹੈ।
- ਤੁਸੀਂ ਬਲਬ ਨੂੰ ਦਬਾ ਨਹੀਂ ਸਕਦੇ।
- ਤੁਹਾਨੂੰ ਆਪਣੀ ਜੈਕਸਨ-ਪ੍ਰੈਟ ਡ੍ਰੇਨ ਦੀ ਦੇਖਭਾਲ ਕਰਨ ਵਿੱਚ ਕੋਈ ਸਮੱਸਿਆ ਆ ਰਹੀ ਹੈ।
Learn about our Health Information Policy.
